1 ტიმოთეს მიმართ 1:17

„სარწმუნო არს სიტყუაჲ და ყოვლისა შეწყნარებისა ღირს, რამეთუ ქრისტე იესუ მოვიდა სოფლად ცოდვილთათჳს ცხორებად, რომელთაჲ პირველი მე ვარ. არამედ ამისათჳს შევიწყალე, რაჲთა ჩემდა მომართ აჩუენოს პირველად იესუ ქრისტემან ყოველი სულგრძელებაჲ მისი სახედ მერმეთა მათ მორწმუნეთა მისა მიმართ ცხორებად საუკუნოდ.“ (1 ტიმ 1:15–16).

1. სარწმუნო სიტყვა ცოდვილთა ცხონებაზე

ღვთის კეთილმოქმედებანი იმდენად დიდია და ისე აღემატება ყოველ ადამიანურ მოლოდინსა და სასოებას, რომ ხშირად დაუჯერებლადაც კი ეჩვენებათ. რადგან რაც ადამიანურ გონებას არც მოუფიქრებია და არც მოულოდნია, სწორედ ეს მოგვანიჭა ჩვენ. ამიტომ მოციქულებიც დიდ სიტყვას უძღვნიან ამას, რათა სარწმუნოდ იქნეს მიღებული ღვთისგან ჩვენთვის მონიჭებული ნიჭები. როგორც დიდ სიკეთეთა შემთხვევაშიც გვემართება და ვამბობთ: ხომ არ არის სიზმარი? ამას ურწმუნოების გამო ვამბობთ; ასევე ხდება ღვთის ნიჭებთან...

...რომ 9:4–5)⁸. და კვლავ, სხვაგან: „ხოლო მეუფესა მას საუკუნეთასა უხრწნელსა, უხილავსა, მხოლოსა ბრძენსა ღმერთსა პატივი და დიდებაჲ უკუნითი უკუნისამდე. ამინ.“ (1 ტიმ 1:17). ასევე წინასწარმეტყველმაც აქ, როცა გაიაზრა საყოველთაო განგება, ეგვიპტეში მომხდარი წყლული, უდაბნოში აღსრულებული მრავალგვარი და სხვადასხვანაირი კეთილისმყოფელობანი, იუდეველთა მიმართ აღსრულებულნი და მათთვის მტრებზე მოვლენილნი, და მისი გამოუთქმელი კაცთმოყვარეობით აღენთო, დიდებისმეტყველება აღავლინა და თქვა: „უფალო, სახელი შენი უკუნისამდე და საჴსენებელი შენი თესლითი თესლადმე.“ (ფსალმ 134:13).

ესე იგი, შენი დიდება განუწყვეტელია. რადგან ვერაფერი აზიანებს მას, ვერაფერი წყვეტს მას, არამედ არის მარადის და რჩება უცვალებელი, გარდაუქმნელი, აყვავებული და ძალით სავსე. და რას ნიშნავს: „საჴსენებელი შენი თესლითი თესლადმე“ (...