1 ტიმოთეს მიმართ 2:14

„დედაკაცი მდუმრიად ისწავებდინ ყოვლითა დამორჩილებითა. მოძღურებად დედათა არა უბრძანებ, არცა მთავრობად ქმრისა, არამედ რაჲთა იყოს იგი მყუდროებით. რამეთუ ადამ პირველად დაებადა და მერმე - ევა. და ადამ არა სცთა, ხოლო დედაკაცი იგი სცთა და შჯულსა გარდაჰჴდა, არამედ ცხონდების შვილთა სხმისაგან, უკუეთუ ეგნენ სარწმუნოებით და სიყუარულით და სიწმიდით ღირსებასა ზედა.“ (1 ტიმ 2:11–15).

1. დედაკაცის მდუმარება და შვილისშობით ცხონება

ნეტარი პავლე ქალებისგან დიდ კრძალულებას მოითხოვს, დიდ წესიერებას. ამის გამო იგი მხოლოდ გარეგნობასა და სამოსის წესიერებაზე კი არ ჩერდება, არამედ ხმამდეც მიდის; და რას ამბობს? „დედაკაცი მდუმრიად ისწავებდინ ყოვლითა დამორჩილებითა“ (1 ტიმ 2:11). რას ნიშნავს ეს? ეკლესიაში ქალმა ხმაც ნუ ამოიღოსო, ამბობს; ამასვე ამბობდა კორინთელთა მიმართ ეპისტოლეში, როცა წერდა:...

...ასჯელი, თუმცა ცოდვა იგივე იყო? იმიტომ, რომ ერთი და იგივე არ იყო ქალის მიერ მოტყუება და გველის მიერ მოტყუება. ამიტომაც პავლემ ევას შემთხვევას შეცდენა უწოდა, როცა თქვა: „და ადამ არა სცთა, ხოლო დედაკაცი იგი სცთა და შჯულსა გარდაჰჴდა“ (1 ტიმ 2:14). რატომ არ ეღირსა კაცთმოყვარეობას შეშის შემგროვებელი? იმიტომ, რომ დიდი ურჯულოება იყო მცნების თავიდანვე და მაშინვე დარღვევა, და საჭირო იყო სხვებშიც დიდი შიში ჩადებულიყო. ეს მოხდა საფირასა და ანანიას შემთხვევაშიც. ამრიგად, ჩვენც, როდესაც ვცოდავთ, ვიხილოთ, ვართ თუ არა წყალობის ღირსნი: გავაკეთეთ თუ არა რამ, რის გამოც შეწყალებას მივიღებდით, შევინანეთ თუ არა, გავხდით თუ არა უკეთესნი, განვშორდით თუ არა ცოდვას. რადგან მონანულის ცხონებაც წყალობით ცხონებაა.

ამიტომ ისიც ამ საფუძვლებით ითხოვს ცხონებას — ცრემლებითა და გოდებით. რადგან ამბობს: **„დავბანო მარად ღამე ცხედარი ჩემი, ც...