...ამგვარი მდგომარეობისა; ამის შესახებ ისმინე, რას ამბობს სოლომონი: „რამეთუ სავსე არს შურითა და გულისწყრომითა ქმარი მისი; არა ერიდოს დღესა სასჯელისასა. ვერ გამოიჴსნეს რავდენითავე საჴმრითა მტერობისა მისგან, არცა დასცხრების მრავლითა ძღუნითა" (იგავ 6:34–35); და კიდევ: „ფიცხელ არს, ვითარცა ჯოჯოხეთი, შური" ().
5. მართლის კეთილგონიერება და სარას კეთილზნეობა (12:11-13)
ჩვენ ვხედავთ, როგორ ბევრი ამგვარ მდგომარეობაში ისეთ გააფთრებამდე მიდიოდა, რომ არამხოლოდ ცოლებს არ ინდობდა, არამედ ხშირად შემაცდუნებელთან ერთად თავსაც კლავდა. ასეთია ამ ვნების მძვინვარება და ისე მოუთოკავია ეჭვიანობა, რომ საკუთარი სიცოცხლის უგულებელყოფამდე მიიყვანს მას, ვინც ამ ვნებამ ერთხელ წაიტაცა. მაშ, ამიდან შეიძლება მართლის მამაცობის შეცნობა; ხოლო მისი დიდი კეთილგონიერება იმაში ჩანს, რომ ასეთ გაჭირვებულ მდგომარეობაში და თითქოს მახეებით გახლართულმა, იპოვა საშუალება, რომ ბოროტება მაინც ნაკლები ყოფილიყო. მართლაც, თუ ეტყოდა, რომ ის მისი ცოლი იყო, თუ ამის ნაცვლად არ დაარქმევინებდა დად, მაშინ ცოლსაც წაართმევდნენ მართალს სილამაზის გამო, რომელიც თავშეუკავებელ ეგვიპტელებს წაიტაცებდა, და მართალსაც მოკლავდნენ, რომ მათი ურჯულოების მამხილებელი არ ყოფილიყო. მაშ, რადგან ორი ე...