გამოსლვათა 3:7

...ხოლო რასაც ამბობს, ეს არის: უბედურება და ჩვენი ბოროტად ტანჯვა საკმარისი აღმოჩნდა, რომ იგი მოელმო. რადგან დასაწყისშიც, როცა ისინი ეგვიპტიდან იხსნიდა, არ უთქვამს: „ხილვით ვიხილე მათი უკეთესობისკენ მიდრეკა“, არამედ: „ხილვით ვიხილე მე ძჳრი ერისა ჩემისა, რომელ არს ეგჳპტეს შინა“ (გამ 3:7). „და მიჴსნა ჩუენ მტერთა ჩუენთაგან“ (ფსალმ 135:24). რათა ცალ-ცალკე არ ჩამოთვალოს ომები, თავდასხმები, გამარჯვებები და ძლევის ნიშნები, კვლავ ერთ სიტყვაში გაივლის წარმატებათა წყებას, იუდეველებთან დაკავშირებულ ნაწილობრივ საქმეებს ტოვებს და მის საყოველთაო განგებაზე გადადის, როცა ამბობს: „რომელმან მოსცის საზრდელი ყოველსა ჴორციელსა“ (ფსალმ 135:25). სხვა ამბობს: „რომელიც პურს იძლევა“. სხვა კი: „პურის მომცემი“. ამრიგად, ნაყოფთა შობა არც მიწისაა, არც წყლების, არც ჰაერების, არც სხივისა და არც რაიმე სხვა რამისა, არამედ ყოველივე მისი საქმეა....

...ხედავ სიკეთესა და კაცთმოყვარეობას? არ უთქვამს: „ღირსი ვიყავი“; არ უთქვამს: „სათნო საქმენი წარმოვაჩინე“, არამედ მხოლოდ ეს: „მოვუხმე“; და ლოცვა საკმარისი აღმოჩნდა უბედურების მოსახსნელად, რასაც ეგვიპტელთა დროსაც ამბობს: „ხილვით ვიხილე მე ძჳრი ერისა ჩემისა“ (გამ 3:7) და „გარდამოვედ განრინებად მათა ჴელისაგან მეგჳპტელთასა“ (გამ 3:8). არ უთქვამს: „ვიხილე ჩემი ერის სათნოება“, არც ის, რომ უკეთესისკენ მათი მოქცევა ვიხილეო, არამედ: „ვიცი იგი ჭირი მათი“ და „ღაღადებაჲ მათი მესმა“ (გამ 3:8). ხედავ გულმოწყალე მამას, რომელიც მხოლოდ უბედურებათა გამო შეეწევა? თუმცა არც ყოველი, ვინც ჭირშია, ხსნის ღირსია, ადამიანთა შორისაც კი. რადგან როცა მრავალ მსახურს ვხედავთ გვემულსა და ტკივილით შეპყრობილს, მათ მაინც არ ვათავისუფლებთ, რაკი ცოდვათა სიდიდეს ვიაზრებთ; ღმერთმა კი მხოლოდ ჭირის გამო გაათავისუფლა; და არა მხოლოდ ჭირისგან გაათავისუფლა, არამედ დიდი უსაფრთხოებაც მისცა....