...გაკეთებაც მათ მიმართ გადაწყვიტეთ. და როგორც სიქემი გახდა ასეთი დაღუპვის მიზეზი მამისთვისა და ქალაქის ყველა მცხოვრებისთვის, ასევე თქვენ — ჩემთვის. თქვენ გამო მეც საძულველი გავხდები და ვერაფერი შეუშლის ხელს მათ, თქვენი თავხედობის გამო მეც მომკლან. „ხოლო მათ ჰრქუეს: არამედ, ვითარცა მეძავი იჴმიონა დაჲ ჩუენი?" (). მაშ, იაკობის ძეებმა შურისძიება სიწმიდის გრძნობით მოახდინეს; ისინი მამის წინაშე იმართლებენ და ამბობენ: მცხოვრებლებმა შეგვარცხვინეს; ისინი ჩვენს დას, შეიძლება ითქვას, მეძავივით მოექცნენ. ჩვენ იძულებულნი ვიყავით ასე მოვქცეულიყავით, რომ სხვებისთვისაც მომავალში დარიგება ყოფილიყო — ასეთი თავხედობა არ მოეხდინათ.
4. იაკობის გადასვლა ბეთელში და კერპების განადგურება (35:1–8)
მაგრამ ყურადღება მიაქციე აქაც მართლის მიმართ ღვთის გამოუთქმელ მზრუნველობას. რადგან ხედავდა, რომ ძეების საქციელის გამო აქ დარჩენის ეშინია, „ჰრქუა ღმერთმან იაკობს: აღდეგ და აღვედ შენ ბეთელდ და დაემკჳდრე მუნ" (). შენ აქაურ მცხოვრებთა გეშინია; გადი აქედან და ბეთელში იცხოვრე, **„და აღუშენე მუნ საკურთხეველი ღმერთსა, რომელი გეჩუენა შენ, ოდეს-იგი ივლტოდე შენ პირისაგან ესავისა, ძმისა შენისა. და ჰრქუა იაკობ სახლსა თჳსსა დ...