...4:20). მცხოვრებლებმა მაშინვე შეასრულეს ემორისა და სიქემის სიტყვა და ყველამ ერთად წინადაცვეთის ნიშანი დაისვა სხეულზე. ხოლო სიმეონმა და ლევიმ, ამის შეტყობისთანავე, გადაწყვიტეს თავიანთი ჩანაფიქრი ასრულებაში მოეყვანათ. „მოიღეს, — ნათქვამია, — კაცად-კაცადმან მახჳლი თჳსი და შევიდეს ქალაქად განკრძალულებით" (). რას ნიშნავს „განკრძალულებით"? იმას, რომ თუმცა ისინი ორი გამოვიდნენ ასეთი სიმრავლის წინააღმდეგ, მაგრამ დიდ უსაფრთხოებას ის აძლევდათ, რომ ყველა დაჭრილივით იწვა. ამის ასახსნელად საღვთო წერილი შენიშნავს: „და იყო დღესა მესამესა, ვითარ იყვნეს ოდენ სალმობასა შინა". ეს გარემოება სიმეონსა და ლევის უსაფრთხოებას აძლევდა და მათ ორს ბევრზე ძლიერს ხდიდა. „და მოსრეს ყოველივე მამაკაცი", ანუ ყველა მამაკაცი, რომლებიც წინადაცვეთის სალმობაში იწვნენ და, ასე ვთქვათ, უკვე მოკვლისთვის მზად იყვნენ. სხვებთან ერთად ჭაბუკსაც დაესხნენ, რომელმაც მათი და შეურაცხყო; მაგრამ ასეთი შურისძიებით არ დაკმაყოფილდნენ, ცხვრებიც და მთელი საქონელიც წამოიღეს, ყველა ბავშვიც, და ქალაქსთან ერთად ხალხიც რომ გაანადგურეს, უკან დაბრუნდნენ. ხედავ, საყვარელო, რა ბოროტება გააჩინა ერთი ჭაბუკის უგუნურებამ? ხედავ, რა დაღუპვა მოუტანა მან ქალაქის ყველა მცხოვრებს?
ამის მცო...